Tahun Alah Baru, Prilaku Jan Masih Nan Lamo Juo……

0
131

Oleh WANDY————————————————————————

WESKI baru dalam hitungan jam mainjak tahun baru 2020, namun masih banyak prilaku buruak pada tahun 2019 lalu nan harus dibuang dek para pajabat, masyarakaik dan anggota dewan di Kabupaten Solok.

“Awak sangek baharok Kabupaten Solok nan kito cintoi ko, labiah maju dari tahun-tahun sabalumnyo. Sarupo harapan apak Bupati jo Ketua DPRD awak. Jan samo pulo tahun baru ko jo tahun 2019 lalu. Kok masih samo juo, kecek agamo marugi awak nah nakan,” jaleh Mak Malin Sampono ka Andy Bule, katiko duduak-duduak sambie maota di Tugu Ayam Arosuka, Rabu sore kapatang.

“Tantu iyolah, Mak! Kok samolo tahun baru ko jo tahun nan sudah-sudah, yo cilako awak mah, Mak! Kok bisa, prilaku awak di dalam nagari barubah handaknyo. Sudah tu, disiplin PNS awak labiah tinggi dan loyalitasnyo malayani masyarakaik iyo jo senyum manih dan panuih sapo dari pado tahun lalu. Jan katiko diangkek jadi pajabaik, alah bak kato awak lo nan rajo. Jabatan tu kan hanyo samantaro dam harus amanah dalam malayani masyarakeik, bukan malah untuk minta dilayani lo,” jawek Andy Bule, sambia mambaleh WA dari kawannyo di nan tingga di Batam yang mananyoan harago bareh Solok salomo musim hujan ko.

“Batua sakali nah nakan. Kok tahun lalu para PNS masih main gim jo duduak di kantin pado saat jam karajo, mako tahun kini kebiasaan tu barubah handaknyo. Atasan harus manegus bawahan nan salah dan bawahan harus patuhi jam karajo. Sudah tu harus ado sanksi nan kareh untuk para PNS dan apak dewan nan indak disiplin. Apo lai kapatang ko baru digulirlan roda mutasi,” jawek Mak Malim Sampono, sambia mahiruk rokok kreteknyo nan kasapuluah dalam satu jam terakhirko. Maklum sajo, selain cuaca Arosuka nan dingin, sudah tu ditambah hujan turun indak baranti alah hampia sabaluan terakhirko. “Satuju bana mah, Mak Malin! Kapatangko alah balantik lo pajabaik eselon duo jo tigo untuak mampakuek roda pemerintahan. Kabanyo urang nan dilantik iyo lai banyak urang nan dakek jo Bupati dan Wakil Bupati. Kok urang tu salah, apak Bupati kan bisa mambaga urang tu langsuang,” sambuang Andy Bule, nan tangannyo amsih sibuk manakan tuts Hape mambaleh WA kawannyo dari Batam tu. “Kok banyak urang dakek Bupati jo Wakil Bupati sarupo dunsanak jo rang sumando atau kaum karabat nan diangkek, itu KKN namonyo mah nakan. Pi KKN alah dilarang dek pemerintah pusek. Beko tibolo apak KPK di tampek awak, tu jaleh awak juo nan kamalu,” sambuang Mak Malin Sampono, sambia matonyo tatuju mancaliak anak sakola sadang asyik mamadu kasih dakek rumpun bungo sambie tampak selfie-. Selfie baduo.

“Lho, kok urangnyo lai mampu dan berkompeten, apo salahnyo, Mak! Tantu samo wak caliak gebrakan karajonyo dalam saratuh hari ko. Sudah tu kalau ndak mampu, Bupati harus barani memecat urang nan indak loyal tu,” jaleh Andy Bule, sambia tangannyo sibuk manakan tuts Hp mambaleh WA kawannyo.

“Sabanyo apo makna tahun baru dek nakan, ko! Patangko amak caliak, banyak nan gaek-gaek pai merayakan tahun baru di tapi Danau Singkarak dan bergabung lo samo nan mudo-mudo. Sudah tu di Jawakarta kabanyo terlalu banyak petasan dan kambang api nan ditembakam kalangik, sahinggo langik bocor dek kanai tembak dan menyebabkan Jakarta dikepung banjir,” ucap Malin Sampono sambia matonyo mancaliak ka jalan raya nan masih licin habis diguyur hujan labek.

“Nan jaleh bana, tahun baru 2020 ko, handaknyo jauh labih rancak dari tahun 2019 lampau. Kalau awak saurang petani, pasti baharok agar hasil panen tahun iko labiah rancak dari tahun lalu. Jikok pagawai, selain mau naiak pangkat, tantu sumangek karajo jo tingkek kahadiran harus diutamokan. Kalau anak sikola, tahun lalu kelas satu SMP, mako tahun kini pasti berharap naiak ka kelas duo,” tutur Andy Bule sambia sakali-kali mancaliak berita bola di KORAN PADANG nan alah manajdi.

“Kok anak sikola satu ka naik sikola duo itu alah biaso mah, Ndy. Indak lucu do! Tapi nan paralu bana barubah di tahun nan baru ko, iyo parangai apak-apak dewan awak, parangai masyarakaik jo parangai PNS harus barubah. Sarupo kecek surek kaba Koran Padang nan awak baco patangko, baa pegawai nan sering bolos tahun patang tu rajin masuek tahun kini. Baitu juo, baa apak-apak anggota dewan nan acok kalua daerah tahun lalu, mako tahun kini apak-apak tu lebih sering manjapuik aspirasi masyarakat di daerah asal pemilihannyo,” jaleh Astra,
nan dari tadi sibuk mambaleh komen kawannyo di facebook.

“Kalau itu ambo satuju nah. Jan hanyo waktu kampanye se rajin turun ka bawah, giliran wak kamangduan masalah, apak-apak dewan tu indak nampak batang iduangnyo lai,” terang Andy Bule, tampak saketek akur jo Astra, nan biasonyo manjadi lawan kareh kongsi angek (penulis adalah wartawan Harian Umum Koran Padang )

TINGGALKAN KOMENTAR

Masukkan Komentar
Masukkan Nama Anda