PLN Tu Yo Kurang Aja

0
775

OLEH: WANDY

 

 “Yo sabana kalera PLN, ko! Awak sadang masak nasi untuak laki awak, tibo-tibo lampunyo matian dek urang PLN tu. Padohal tadi malam, alah tigo jam lo nyo matian lampu. Apo ndak ado karajo petugeh PLN tu salain mamatian lampu. Kok awak talambek mambayia, kanai dando, samantaro inyo mamatian lampu sasuko hatinyo sajo, sarupo makan ubek, tigo kali lo dalam satu hari. Indah jaleh barang elektronik wak nan masih dikeredik rusak dek inyo do,” keluh Ni Benti, bini Da Indra pemilik lapau politik, ka Mak Sutan Sampono dan Andy Bule, nan sadang asyik maotaan perjalanan anggota DPRD Kabupaten Solok ka lua daerah pada saat masyarakatnyo sadang titimpo.

“Batua tu, Ni Ben! Urang rumah ambo nan biasonyo jarang mangaluan kato-kato kasa, kini alah ikut-ikut pulo bacaruik dek ulah parangai PLN nan acok mamuduean lampu. Sudah tu indak pandang waktu, nan paliang parah bana mau subuah jo shalat Maghrib. Iyo sabana kalera mah, ni!,” sambuang Andy Bule, seolah maraso puas meluapkan rasa emosinyo ka PLN. “Paralatan elektronik uni alah banyak nan rusak, sudah tu bola lampu putuih sakali saminggu. Kalau lah mode ko, kasia awak kamintak ganti rugi dan mangadu. Apo ka PLN atau ka Pak dewan awak?,” sambuang Ni Benti lagi. “Iyo mah, Ni! Kalau di pulau Jawa ado namonyo Yayasan Lembaga Konsumen Indonesia atau YLKI untuak mangadukan karugian masyarakat dek sebuah instansi atau lembaga tu. Kalau di Solok ko, kama wak ka malapehan uneg-uneg ko?,” sambuang Andy Bule, yang kebetulan dulu lamo marantau di pulau Jawa, jadinyo tau bana, kalau urang dirugikan dek suatu pelanggan atau konsumen, mako bisa mangadu dan ditindak lanjuti dek YLKI.

“Amak dari tadi alah mandanga kaluahan kalian. Amak yo alah mangarati pulo baa  persaan Upiak Banun jo si Andy Bule kini mah! Di rumah amak alah banyak lo barang-barang elektronik nan rusak. Sudah tu anak-anak ka manonton siaran favoritnyo di tivi indak bisa. Tapi nan paralu awak cermati, baraso masalah iko kasado alahnyo, iyo sabana cobaan dari Allah untuak kito. Disaat mancri pitih sulik, musim badai jo angin kancang, ditambah lo joparangai PLN nan acok mamatian lampu salamaknyo sajo, jadi kuncinyo hanyo ciek, yakni harus basaba dan anggap  sajo kasadonyo cobaan dari Allah!,” sela Mak Malin Sampono, sambia matonyo mancaliak ka arah Gunuang Talang nan alah hampia duo Minggu indak tampak dek musim pa hujan. “Saba sih saba Mak Malin! Dari dulu awak tetap basaba. Tapi kini alah sampai saba awak ka ubun-ubun, lah jaleh aia kurang tiok tahun untuak mahidupkan lampu, baa kondak dari dulu urang PLN tu mancari solusi. Kajadian sarupo ko paliang acok tajadi di negara awak. Di Cino atau di Inggirih atau di Japang bagai, jarang awak danga mati lampunyo. Baa ko indak amuah baraja urang awak kasinan. Pado hal DPR RI lai acok lo ka lua nagari. Mangaanyo, pai jalan-jalan se?,” tanyo Ni Benti, tampak raut mungkonyo masih mengandung kecewa berat, sabek pas asik mamasak nasi, tibo-tibo lampu mandadak mati, tanpa ado sakik tarlabih dulu. “Iyo, awak ambiak selah hikmahnyo baraso iko adolah ujian yang datang dari Allah. Alah bara lmo awak indak mancaliak matohari dan gunuang Talang? Sabananyo iko adalah azab nan diturunkan dek Allah, akibab ulah manusia juo. Sabek Allah befirman dalam Al Qur’an bahwa telah terjadi kerusakan di darat dan di laut, akibab ulah manusia juo,” cetus Mak Malin Sampono, nan nyo angguakan dek Andy Bule, antah mangguak dek mangarati atau dek manunggu kopi nan alun alun juo datang meski alah dipasan dari tadi***

LEAVE A REPLY

Please enter your comment!
Please enter your name here