Nagari Indak Ba Sinyal………

0
561

  Oleh: Wandy

USIA Kabupaten Solok pado tanggal 9 April Tahun 2018, alah genap berusia 105 tahun. Namun bak carito urang di Lapau Mak Rusli di jorong Lurah Gadang nagari Sariak Alahan Tigo, Rabu kapatang, meski Kabupaten kebanggaannyo alah gaek duo pulueh tahun labiah dari negara Republik Indonesia ko, tapi jorongnyo masih alun mardeka.

Artinyo, jikok dibandiang nagari lain nan alah ado listrik, signal hp bagus dan jalan mulus serta sarana kesehatan, di Lurah Gadang tu masih jaueh tatingga. “Mak, ambo baco di KORAN PADANG ka patang, katonyo umue Kabupaten awak ko alah labiah saratuh tahun. Kalau itu bana, baa kok kampuang awak sampai kini alun juo ado listrik jo jalan baaspal lai. Sudah tu, masyarakat awak alun juo bisa menggunakan Handphone karano indak sinyal sabek alun ado tower seluluer,” tanyo Zulfa, kapado Mak Intan Sati, nan sadang mangopi siang di lapau Mak Rusli. Meski tingga di daerah tampancia, namun warga Sariak tetap hidup rukun dan penuh kadamaian. “Kalau itu batue mah, Zulfa! Malah kabanyo umue Kabupaten awakko labiah gaek dari negara Republik Indonesiako duo pulueh tahun,” jawek Mak Intan Sati kapado Zulfa. “Tapi baa kok kampuang awak masih tatingga, Mak! Caliak sajo, sampai kini alun ado masuek ka kampuang awak tower nan tinggi, sarupo di nagari-nagari nan ado di kecamatan Kubuang jo Gunuang Talang, Mak?,” ujar Zulfa, baliak batanyo ka Intan Sati, yang merupakan tokoh masyarakat Sariak Alahan Tigo dan sempat sakola tinggi di kota Padang. “Deh, kok itu dalam pertanyaan waang mah Zulfa!. Beko kalau amak mangecek agak tinggi, tasingguang pulo urang dek amak,” jawek Intan Sati. “Tasingguang baa maksud maka, ko?,” Zulfa malah Baliak batanyo ka Mak Intan Sati. “Maksud Mamak mode ko, kalau sesuai laporan urang Bappeda kapatang di Musrenbang Kabupaten Solok, dari 25 nagari tatingga zaman kepemimpinan Apak Bupati awak Syamsu Rahim, masih ado 25 nagari tatingga alias IDT. Tapi sasuai laporan kapatang, indak ado nagari tatingga di Kabupaten Solok ko lai. Tapi buktinyo kampuang awak jo kampuang tatangga sabalah masih alun maju juo lai. Apo ko ndak alue-alue se namonyo ko?,” jawek Intan Sati, seakan malah baliak batanyo ka Zulfa. “Ondeh, mode tu ruponyo, Mak! Kalau itu batue, berarti seluruh nagari di Tigo Lurah alah maju mah, Mak. Tapi baa kok nagari awak masih mode ko juo?,” ujar Zulfa seakan tak percaya dengan omongan Mak Intan Sati. “Maju apak mande waang! Satau ambo nan baru pulang dari Garabak Data ka patang, masih mode nan lamo juo baru. Angkutan masih kudo baban juo, listrik masih menggunakan lampu cogok. Jaringan HP indak ado. Sudah tu bisan desa alun masuek lai,” sela Eri Satri, yang dari tadi asyik memainkan musik-musik Minang dari Hpnyo, maklum kalau mau nelfon ndak ado sinyal. “Ambo indak tau do Da Eri, satau ambo Kabupaten ko hari kini alah berusia 102 tahun. Tapi rasonyo kalau mode ko, berarti Kabupaten awakko masih berusia duo tahun, bukan seratus tahun seperti nan diberitakan koran tu. Kalau alah saratuh tahun, tantu alah maju Kabupaten awak,” jawek Zulfa***

LEAVE A REPLY

Please enter your comment!
Please enter your name here