Oleh: Wandy
“BAA kok buruak bana manuang Mak Malin kiniko. Apoko ado masalah jo mintuo awak di rumah?,” tanyo Andy Bule, nan sajak tibo di lapau politik milik Da Indra, Mak Malin Sampono agak banyak bamanuang, indak sarupo biaso ado se nan kadiotaan Mak Malin Sampono tu. Tapi alah agak satangah jam duduak di lapau tu, Mak Malin labiah tanang dan matonyo sibuk manonton Tivi nan sadang menyiarkan berita Menteri ESDM dibarantikan dek presiden karano diduga memiliki duo KTP alias KTP ganda.
“Baa indak kaibu ati amak dek Andy! Di negara awakko kini alah banyak nan kacau, indak jaleh ujuang pangkanyo. Saketek-saketek ribuk, samnataro kasus korupsi, narkoba dan teroris banyak nan alun jaleh ujuang pangkanyo. Sudah tu, kasus Mirna minum kopi sianita yag diagiah racun dek kawannyo Jessica, hampai mahiasi layar tivi tiok hari. Samantaro masih banyak kasus lain nan alun tuntas. Apo pulo maksud para pemimpin negeri ini dek Andy tu?,” jawek Mak Malin Sampono, nan biasonyo tiok duduak mambaka rokok keretk kesukaannyo. Tapi sajak mandanga rokok akan dianaikan haragonyo dek pemerintah manjadi 50 ribu satu bungkuhnyo, Mak Malin sangajo baraja baranti marokok, karano mungkin indak mangaluan pitih 150 sahari hanyo untuak mambali rokok, sabek Mak Malin bisa mahabiskan tigo bungkuh rokok tiok hari.
“Oo, kalau masalah tu, amak sarupo indak tau se mah. Tapi di negara awak banyak urang politik, mako alah jaleh tujuannyo agar kasus nan lamo bisa ilang kalau ado kasus nan baru. Makasuk Andy tujuannyo untuak maalihkan paratian publik mah, Mak,” jawek Andy Bule, nan jari tangannyo sibuk mambaleh WA kawannyo dari Kota Jakarta nan mananyoan apoko buah markisa jo ika bilih produksi Solok masih banyak ju di jua di sepanjang jalan Sumatera di daerah tu. “Sudah tu, ati amak batambah sadiah , sabek salah sorang Menteri asa Ranah Minang, yakni Menteri ESDM, Alcandra Tahar, alah dibarantian dek apak Presiden, karano diduga dikompori dek urang partai politik nan indak mandapek jatah Menteri. Atau apo mungkin apak Presiden awakko mambuek malu urang Minang, sabek belaiu kalah telah di siko,” tarang Mak Malin Sampono nan baru mulai mangaluan rokok kretek dari dalam sakunyo.
“Hahaha, amak Malin ko bisa sajo mah! Bisa jadi nan amak kecekan tu batua juo. Tapi labiah rancak awak bapikia positif sajo kecek rang kini. Bialah karajo nan gadang-gadang diurus dek para pejabat negara ko. Tugeh awak baa paruk anak bini bisa makan dan dapua bisa barasok. Kok mangecek awak beko, bi tasingguang apak-apak pejabat tu dek awak,” tarang Andy Bule, sambia tagalak-galak ketek.
“Sabanyo banyak nan jadi pikiran dek amak mah, Ndy! Sarupo kasus bandar narkoba nan dihukum mati patangko yaitu Feri Budiman nan mangecekan baraso banyak para aparat penegak hukum nan alah manarimo jatah dari hasil penjualan barang haram tu. Tapi kok iyo bana kecek apak tu, manga indak ditunda hukuman mati nan divonis ka baliau. Alah dihukum mati, baru kasusnyo mangapuang. Apo iko indak politik juo dek Andy tu. Kok dibairkan pak tu manjadi saksi, mako mungkin banyak aparat penegak hukum nan kapnehan dek inyo mah,” tarang Mak Malin panjang leba***
