Lapau Pilkada……..

0
370

                                OLEH: Wandy

 

Dengan semakin dakeknyo Alek Pemilihan Bupati jo Wakil Bupati di Kabupaten penghasil bareh tanamo tu, mako kini alah bamunculan lapau-lapau atau kadai yang khusus membahas masalah pemilhan calon kapalo daerah.

“Ko yo sabana angek berita Koran Padang hari kini mah, Mak! Urang nan indak dalam masuek paretongan dalam bursa bakal calon Bupati jo Wakil Bupati, tau-tau kini alah bapasangan se jo kandidat kuat. Apokoh iko nan dimaksud jo politk?,” tanyo Astra, kapado Mak Ampang, katiko minum kopi siang di kadai Da Indra, kawasan Arosuka, Rabu Kapatang. “Kalau itu batue bana mah, Wahyu! Politik itu sangat praktis, kini iyo, beko sore bisa se jadi idak mah. Jadi awak masyarakat jelata ko, jan sampai mau pulo diadu domba dek para tim sukses atau calon nantinyo, apo bilo alah mulai kampanye,” tarang Ampang. “Makonyo mulai dari kini, awak mulai kampanye pilkada damai ka masyarakat, bahwa semua calon yang akan maju rancak, mako piliahlah sasuko hati awak sia nan taragak. Awak mulai kampanye ketek-ketek dari lapau politik ko lai,” sela Andi Bule, yang dari tadi asyik mamatuk-matuk batu akiak nan ado ditangan kirinyo. Maklum batu akiak jenis Lumuk Sungai Kalu tu, baru diasah di tukang batu akiak tadi pagi.

“Awak satuju bana, kalau satiok lapau politik di Kabupaten Solok ko, berusaha untuk tidak mampaangek suasana menjelang Pilkada. Silahkanlah para kandidat berkampanye dan mencari dukungan, tapi jan suko maadu domba wong cilik. Sabek awak ko masyarakat hanyo akan dijadikan sebagai objek penderita sajo. Bilo Bupati alah tapiliah, nasib awak ka bantuek iko juonyo. Awak lah kasamo jo ayam, kalau ndak mangakeh, dak kadapek rasaki awak do,” jelas Da Indra, pemilik lapau politik. “Tapi kalau wak taropong-taropong, pilkada tahun kini agak angek mah, Mak! Selain mantan Bupati awak akan sato mancalon, ado juo incumbent nan kamaju. Ko sabana seru mah!,” tarang Astra lagi, sambil membuang puntuang rokoknyo yang kesembilan, salamo duduek di lapau politik tu.

“Sabagai urang nan lai sato lo makan bangku sakolahan dulu, amak hanyo minta ka waang, Ndi! Agiah panaranganlah masyarakat awak ko, jan sampai satolo angek-angekan manjalang Pilkada ko. Amak yakin, semua calon nan akan maju, pasti orang pilihan di Kabupaten Solok. Jadi sia nan banyak nan manang, itu pasti Bupati awak mah,” ceramah Mak Ampang, sambil meminum kopi dingin yang hanyo tingga dadaknyo sajo. “Kalau awak yakin suaro tabanyak, pasti jadi pamanang mah Mak Ampang,” sambuang Andi Bule, sambil galak gadang dan diikuti sura galak saisi lapau. “Anak ketek juo tau, kalau suaro tabanyak pasti jadi pemenag mah, Ndi! Tapi nan awak bicarakan kini, baa di maso kampanye dan manjalang Pilkada ko, awak dak ado nan bapanjang-panjangan urek leher sasamo awak. Kadang-kadang dek indak mandukuang, indak pulo saliang basapoan, itu nan harus awak atasi kini mah. Jan para balon sajo nan pandai bapolitik, awak harus pandai pulo, jan sampai masyarakat awak jadi korban politik,” oceh Da Indra, menceramahi Andi Bule.

“Ondeh, yolah samo lo kato-kato Da In ko jo kato-kato Pak Mario Teguh lai. Barasiah bana bunyinyo. Kalah lo kato-kato Khairil Anwar dek inyo,” tutur Andi Bule, sambia manyindia bahasa Da Indra sang pemilik Warung Politik***

 

LEAVE A REPLY

Please enter your comment!
Please enter your name here