Kapalo SKPD Baru

0
1161

“Amak baco di KORAN PADANG, kabanyo alah dilantik kapalo dinas baru untuak setiok SKPD di Kabupaten awak ko yo nakan. Kok iyo lai bana, tantu awak baharok agar banyak tajadi parubahan kaarah nan labiah baiak untuk daerah Kabupaten Solok kamukonyo,” tanyo Mak Malin Sampono ka Andy Bule, sarupo biaso katiko sadang duduak-duduak di lapau da Indra, kawasan Arosuka, Rabu sore kapatang.

“Itu batue mah, Mak Malin! Tantu harapan awak basamo, dengan balantiknyo kapalo SKPD nan baru ko, awak harokan akan ado parubahan untuk daerah awakko kamuko. Mudah-mudahan kapalo dinas nan balantik tu, lai punyo SDM handal, bukan hanyo SD sajo,” jawek Andy Bule, sambia mangetik balesan WA di hapenyo nan baru. “Emangnyo apo beda SDM jo SD tu nakan. Kan lai samo-samo ado SD nyo mah,” tanyo Mak Malin Sampono agak saketek heran dek bahaso Andy Bule nan agak terkesan berkelas tinggi. “Kok SDM tu jaleh kualitas manusianyo nan hebat nah Mak! Tapi kalau hanyo SD sajo,  kan itu masih barajao tulih baco baru. Kalau ndak salah baru bisa mambaco ini Budi dan ini kakak Budi atau ini Wati. Tapi kalau lah punyo SDM nan rancak, mako urang tu bisa dibao katangah dan punyo wawasan dan inovasi nan tinggi untuk mambangun Kabupaten awakko,” tarang Andy Bule, agak panjang leba. “Oo mode tu yo nakan. Amak ko kan urang indak basikola tinggi dan indak pernah makan bangku kulihan, jadi amak indak baitu faham bana bahaso urang politik. Sabagai urang Solok nan gadang dan layie di siko, amak sangek ingin mancaliak  kampuang halaman awakko maju dan sajajar jo Kabupaten lain sarupo nan ado di pulau Jawa. Kadang amak iri mancaliak daerah urang maju-maju, walau daerahnyo gersang,” jawek Mak Malin Sampono, nan nampak dari raut mukonyo agak taibo hatinyo.

“Tantu awak baharok agar kapalo dinas nan baru dilantik tu, iyo lai mampunyoi ide-ide nan rancak untuak diterapkan dibidangnyo masing-masing. Awak contohan sajo Dinas Pariwisata, semoga Pak Kadis Pariwisata nan baru dilantik tu bisa mamajuan dunia pariwisata awak. Baitu juo Dinas Pertanian, kok bisa yo batua-batua nan tau jo kondisi daerah awakko, apo nan cocok dikambangan. Maksud amak, baa padi nan kamanjadi, bawang kamaupiah dan markisah makin bisa ditingkekkan dari dijua buahnyo sajo manjadi minuman sirup siap saji dalam kemasan dan bisa masuak ka super market tanamo, bia agak kayak stek,” jawek Mak Malin Sampono, sambia mahisok rokok kretek kasukaannyo dalam-dalam. “Sabanyo kalau nakan caliak, amak lah pantas lo jadi Kapalo Dinas mah. Sabek nakan caliak, caro pamikiran amak jauh labih maju dari pado urang-urang nan basikola tinggi. Amak lah pantas jadi Sekda mah,” jawek Andy Bule, nan disambuik dek Mak Malin Sampono sambia galak gadang mandanga diriyo alah disejajarkan jo Kapalo Dinas.

“Kok amak Malin Sampono labiah rancak jadi pengamat kapalo SKPD se lai. Kok manjadi kapalo dinas lo, bukan tambah maju daerah awakko. Tapi tambah hancua. Beko liau alah kongkolingkong lo jo kapalo dearah. Karajo indak bisa, tapi setoran  lancar,” jawek Andy Bule, nan disambuik dek galak Mak Malin Sampono jo saisi lapau***

LEAVE A REPLY

Please enter your comment!
Please enter your name here