Kaleideskop Apak Dewan 2017

0
603
Oleh: Wandy

 

“Mak, indak barapo lamo lai, tahun 2017 akan meninggalkan kito basamo. Banyak kisah nan alah awak jalani salamo satu tahun ko, baik suka maupun duka. Jadi awak tantu baharok, tahun nan katibo labiah rancak handaknyo dari tahun kiniko. Kok idak, kecek nan urang santiang-santiang, tahun kini kok samo jo tahun lalu, tantu awak tu marugi mah, Mak,” Ucap  Andy Bule, mambuka ota katiko sadang duduak di lapau politik milik Da Indra di muko kantua Bupati Solok, Rabu sore kapatang.

“Batua sakali mah, nakan Amak!  Kok ado utang tahun kiniko nan alun lunas, capeklah bayia. Beko kaburu mati awak, badoso gadang! Kama kadicari urang nan mahutangan tu. Badoso gadang awak kalau utang indak dibayia,” jawek Mak Malin Sampono, sambia maaduak teh sarok nan baru tibo di mejanyo. “Itu mungkin salah satunyo mah, Mak! Tapi nan pentiang bana, apo karajo awak salamo tahun 2016 go, harus di introspeksi kecek rang kini. Apo ko alah baguno dek masyarakek atau alun. Kok pejabaik awak, apo go jabatan awak tu lai untuak malayani masyarakaik atau alun. Kok anggota dewan awak, apo go karajo awak alah bamaanfaat ka urang nan awak wakili,” baleh Andy Bule, sambia mangetik balasan WA ka kawannyo di HP kaluaran nan tabaru.  Hahahaha, nakan amak bisa sajo. Mandanga anggota dewan nakan baco, amak langsuang fourji sinyal amak. Kok karajo anggota dewan nan ka nakan caritoan, tiok tahun yo lai maningkek mah. Maksud amak maningkek pai kalua daerahnyo. Kok dulu tigo kali sabulan, kini kok amak danga agak limo kali dalam sabulan. Lai indak marugi ka apak dewan tu do. Tapi marugikan masyarakek jaleh, sabek karajonyo hampai indak jaleh, tapi pai bajalan-jalan jo pitih rakyat,” ciloteh Mak Malin Sampono, sambia mahiruk rokok kreteknyo dalam-dalam.

“Itulah Mak Malin! Indak anggota dewan atau pajabaek se nan katimintak patangguang jawaban beko do! Intinyo, kok karajo maleh indak saimbang jo pitih nan ditarimo, mako beko akan dipatangguang jawekan di akhirek. Malaikat akan batanyo, dari mano pitih didapek dan untuak apo digunakan. Jadi kalau indak sasuai, mako cilakolah awak disinan,” jaleh Andy Bule, nan sakali-kali matonyo mancaliak berita di tivi yang mauleh tantang Capres Presiden RI 2019 antaro Jokowi dan Prabowo. “Mangapulo anggota dewan jo pejabaik nan kadigunjingan lai, Mak! Rancak pareso se diri awak surang-surang. Apoko alah labiah baik dari tahun lalu atau alun. Atau saidak-idaknyo salamo satahunko, lai rancak kalaideskop awak atau indak. Kok pejabat nan korupsi, inyo jo kabadosonyo. Manga pulo awak nan sibuk,” sela Astra nan sarupo biaso sibuk main catue jo Da Inda, sipemilik lapau politik.

Mandapek ocehan dari Astra, tampak Mak Malin Sampono jo Andy Bule maangguak-angguak, antah yo lai mangarati atau idak ocehan si Astra***

LEAVE A REPLY

Please enter your comment!
Please enter your name here