Jawi Naiak Kijang

0
435

        Oleh: Wandy

“YO lah sabana canggih zaman kini ko, indak urang se nan naiak oto Kijang lai. Jawi alah sato naik Kijang,” ujar Mak Pono, katiko duduek-duduek di pangkalan ojek, kawasan Simpang Ampek nagari Talang, duo hari nan lalu.

“Apo maksud Mak Pono ko! Maa lo ado jawi naiak kijang. Raso-rasonyo labiah gadang badan Jawi dari pado kijang tu, katiko awak bandiangkan wakatu pai raun ka kabun Binatang kota Bukittinggi saat hari rayo dulu,” terang Jasman, sasamo tukang ojek. “Ndeh, indak nyambuang bana waang ko kecek Mamak do, Man!. Maksud Mamak, jawi alias sapi tu lah acok naiak kijang kini. Bacolah KORAN PADANG hari kini,” tarang Mak Pono lagi.

“Urang sakampuang amak agiah tau, indak ado nan kapicayo, mano ado pulo ado jawi naiak kijang. Alah tabaliak dunia ko mah!,” jawek Maman, seakan tak mau kalau dan indak picayo jo kecek Mak Pono. “Maksud Mak Pono tadi tu, dari dulu di kampuang awak ko alah acok kahilangan kabau jo sapi alias Jawi. Urang maliang tu langsuang mamotong hasil curiannyo di kandang Jawi, sudah tu dagiang jawi di masuekan kadalam oto Kijang untuak di jua,” sela Uncu Angah, nan dari tadi matonyo sibuk calengak-calengok mancari calon panumpang. Sabek dari pagi, sampai jam sapuluah siang ko, baru dapek sewa duo urang anak sakola dan satu orang sewa dewasa, tapi tidak bayar, maklum nan diantaan mintuo inyo surang. “Kalau itu awak lai picayo mah, Mak! Awak kiro kijang nan ado di rimbo tu nan naiak Jawi,” jawek Maman sambia tagalak mamikian kato-kato Mak Pono barusan.

“Kabanyo urang maliang Jawi tu indak kapok-kapok do, Mak! Sabek patangko alah tatangkok pulo surang lai pelaku curnak tu! Untuang lai tatangkok dek apak-apak polisi, kok dek masa tatangkoknyo, bisa-bisa hangus tabaka sarupo pelaku begal nan tajadi di Tanggerang patang nan awak caliak di tivi,” jaleh Mak Pono. “Iyo juo mah, Mak! Ibo awak dek dunsanak awak nan manyabik tak kenal hujan jo paneh, bahkan kilek gadang manyamba, nan urang tu tetap pai manyabik. Kini jawi alah gadang, tau-tau urang se nan manjua. Esmosi awak mandangaannyo mah, Mak!,” sambuang Maman lagi. “Ndeh, waang ko leh, Man! Iyo sabana cocok profesi waang jadi tukang ojek mah!. Urang mangecek emosi, keceknyo esmosi. Kok tadanga dek tukang tes ojek yang berkompeten, indak lulus waang jadi tukang ojek di Simpang ko do!,” tambah Uncu Angah, sambia manyalokan sabatang rokok, nan diincis dari dalam dompetnyo.

“Jadi baa carito jawi naiak kijang tadi, Mak?,” ujar Maman, baliak batanyo ka Mak Pono. “Kok kini kabaa juo lai. Para pelaku alah diamankan dek polisi untuak mampatangguangjawekan perbuatannyo. Sabek indak haknyo, disambat juo. Itu baru hukum di dunia, hukum di akherat alah siap mananti pulo,” cetus Mak Pono, meskipun tukang ojek, tapi ibadahnyo lai rajin. “Awak harap, para pelaku begal jawi tu, indak masuek di mungko kalua di balakang se do. Handaknyo apak-apak nan bawajib tu manjatuhan hukuman nan barek ka urang-urang tu, akar inyo kapok!,” jaleh Uncu Angah, sambia manyalokan masin hondanyo, sabek alah ado ibuk guru SD nan mintaak diantaan pai rapek ka kantue UPT Pendidikan.

“Iyolah, Mak! Awak pai makan pulang ciek lu! Jam-jam saiko jarang sewa mah. Rancak awak mangopi di rumah, sambia marokok lamak!,” tutur Maman ka Mak Pono. “Tasarah di waang lah. Dapek pitiah limo ribu se waang langsuang nak pulang. Makonyo jan talambek babini,” sela Mak Pono ka Maman, nan baru duo bulan jadi panganten baru, meski umuenyo alah mandaketi limo puluah!***

LEAVE A REPLY

Please enter your comment!
Please enter your name here