Jan Batangka Jo Pak Wali Jo BMN Lai

0
832

Oleh: Wandy

 

 

“Mak, kabanyo program “Hayok Mambangun Nagari” alah diluncuan dek apak Bupati jo Wakienyo kapatangko. Kalaulah mode tu, tantu satiok awak arus mandukuang pambangunan nan dirancang dek apak walinagari jo parangkeknyo,” kecek Andy Bule ka Mak Malin Sampono, sarupo biaso mambuka ota di lapau politik milik Da Indra nan indak jauah dari Tugu Ayam, Arosuka.

“Iyo batue bana mah nakan. Amak lai hadir lo pado acara launchiang Program Mambangun Nagari tu patang ko mah. Kecek apak Bupati, Kabupaten Solok ko tamasuak nan capek manyusun APB Nagari di Sumbar ko. Tapi jan capek manyususn se, harus capek lo bakarajo handaknyo,” jawek Mak Malin Sampono, sambia maaduak teh sarok nan alah talatak di ateh meja Mak Malin Sampono. “Batu tu, Mak! Awak kini harus bagerak capek dalam mambangun nagari. Kok carito nan nakan danga, apak Bupati maimbau satiok warga nagari arus bangga ikuik mambangun nagarinyo. Sudah tu, semua elemen masyarakaik, baik nan ado di kampuang halaman atau di rantau, arus dimaksimalkan fungsinyo,” ciloteh Andy Bule, nan sarupo biaso tangannyo sibuk manakan tuts HP mambaleh WA dari kawannyo nan ado di Batusangka, mananyoan harago lado asa Solok nan samakin padeh haragonyo. “Pembangunan nagari akan lanca, kalau unsur BMN jo KAN lai sajalan jo apak walinagari. Indak usai saliang mancurigai, itu bana pasan apak Bupati awak patang nah,” jaleh Mak Malin Sampono sambia mambaka rokok karetek nan alah dianggap sabagai bininyo nan kaduo. “Kok saliang mancurigai juo awak dalam nagari, tantu pambangunan akan tahalang. Bilo juo awak kakarajo lai, samantaro urang lua nagari alah barulang se kabulan,” kecek Andy Bule ka Mak Malin Sampono, nan sakali-kali matonyo mancaliak ka layar Tivi nan manyiarkan barita tentang panehnyo Pilkada DKI Jakarta. “Eh, amak baru danga baru mah nakan, urang nagari mano nan alah pai kabulan, Alahan Panjang atau nagari Singkarak?,” tanyo Mak Malin Sampono agak takajuik mandanga ado urang nagari lua nan alah bolak baliak se kabulan.

“Maksud nakan tu, indak urang nagari nan ado di Kabupaten Solok ko do mak nan bolak baliak ka bulan. Tapi urang luar negeri, sarupo Rusia jo Amerika. Bukan nagari awak nan ado dikecamatan ko,” jawek Andy manarangkan maksud otanyo ka Mak Malin Sampono. “Andeh, amak iyo lupo lo. Kok itu alah dari dulu amak danga mah, urang negara lua tu hebat-hebat utaknyo. Apolai urang Yahudi, itu sabana santiang mah,” kecek Mak Malin Sampono, sambia manyambuang rokoknyo nan putuih bauleh sen.

“Manga pulo ota sampai kalua nagari lai. Di negara awakko sadang bakalebuik urang mah. Tontonlah tivi, saliang hujan saliang sikut dan saliang mangaku hebat ado kini mah. Rancak ota bangga mambangun nagari tadi selai dilanjutkan, baa pemuda dan wanita ikut andil lo dalam mambangun nagari, supayo nagari awakko manjadi maju sarupo kampuang urang di Texas nan ado di carito Filem tu,” sela Astra nan sarupo biaso sibuk mamikian bidak catue jo lawan karehnyo Da Indra. “Ang ado-ado se Mah Astra! Manga pulo urang di pusek tu ka ang pikian. Nan awak urang kampuangko ndak usah tatipu dek berita di tivi. Itu sadonyo untuak nan akan marusak utak awak. Rancak habih manyabik rumpuik, ang main catue lai. Nan dipusek tu alah kasalai juo dek urang-urang gadang tu mah,” jawek Mak Malin Sampono, sambia mahiruk rokoknyo dalam-dalam***wandy***

LEAVE A REPLY

Please enter your comment!
Please enter your name here