Indak Ado Urang Solok Sato TdS

0
356

                                         Oleh: Wandy

“MAK, kabanyo hari Sabtu bisuak, kabanyo TdS nan akan dimulai dari Danau Singkarak. Apo batua tu, Mak Malin?,” tanyo Andy Bule, ka Mak Malin Sampono sambia maaduk teh hanget nan baru inyo pasan. “Itu batua mah, Ndy! TdS tu kan alah manjadi agenda rutin tiok tahun. Sudah tu, kalau ado TdS ko, nagari awak akan banyak dikunjungi dek turis asing dari lua nagari. Apolai peserta balap sepedanya datang dari mancanegara. Kalau wak nak sato manonton, yo karugi rasonyo, Ndy!,” jawek Mak Malin Sampono.

“Ondeh yo asik mah, Mak Malin. Kok uda-uda bule tu mangayuah sapeda, yo rugi rasonyo awak kalau ndak mancaliak. Sudah tu mangayuah sapedanyo labiah kancang dari oto Jasa Malindo Padang Solok nan acok ugal-ugalan tu, Mak!,” jawek Andy Bule, sambia manyindia sopir Jasa Malindo nan acok lalu bak dikaja setan di Kayu Aro. “Itulah, Ndy! Bakecek urang kini, urang bule tu bisa kancang mangayuah sapeda sabeknyo dak makan nasi bagai do. Cukup jo keju atau kantang sen, tanagonyo kuek-kuek. Mungkin dunsanak awak dari lua nagari tu, makan nyo jadian untuak hiduik, bukan sarupo kabanyakan urang awak, hiduik nyo jadian untuak makan,” tarang Mak Malin Sampono sambia tagalak gadang dek caritonyo surang.

“Tapi awak danga, alah nan kalapan TdS ko dilaksanakan di Ranah Minang, alun mandanga awak urang Solok ko sato balomba lai. Apo awak ditakdirkan hanyo untuak manonton? Baa Cabor Balap Sapeda atau KONI awak mancaliak jo manyikapi iko. Atau emang alah pueh se mancaliak urang lua tu mangayuah sapeda di nagari awak?,” ciloteh Andy Bule, sekedar ikut prihatin. “Itulah nan manjadi persoalan, Ndy! Jan kasato balomba, manjadi tuan rumah se bantuaknyo alun siap bana pemerintah awak lai. Cubolah caliak dek Andy, awak kamanjadi tuan rumah pambukaan TdS, tapi kok ditanyo urang kampuangnyo ndak tau raso akan ado balap sepeda di tampek awakko do!. Selain sosialisasi kurang, bantuaknyo Dinas Pariwisata agak takasan cuek bebeksenyo mansosialisasikan ka urang nagari,” sambuang Mak Malin Sampono nan selalu mangikuti satiok perkembangan tabaru nan jadi di Solok dan di Indonesia malaui siaran tivi jo KORAN PADANG nan alah manjadi bacaan Paforitnyo.

“Tantu iyo urang Dinas Pariwisata awak tu maleh bakarajo kareh bana mansosialisasikan TdS ko, sabek inyo alah mandanga raso akan diganti dek Bupati akhir bulan Agustus ko. Jadi untuak apo bakarajo rajin bana, nan awak katacampak juonyo. Apolai wak danga bagian promosinyo, bana-bana indak manggarik,” sela Astra, nan sarupo biaso tiok patang sapulang dari karajo rutin, pasti akan main catur di lapau politik milik Da Indra, meski sajak dari dulu indak pernah dipanggia untuak manjadi atlit catur Kabupaten Solok. “Us, masalah ganti-manganti Kapalo Dinas tu indak urusan awak do, Astra. Biaselah Bupati jo Wakil Bupati nan manantuan,” jawek Mak Malin Sampono ka Astra.

“Iyo, Mak Malin! Mangalo Astra tu nan sibuk, mau diganti atau indak, itu ndak urusan inyo bagai do. Sarahan selah ka Bupatijo Wakianyo,” potong Andy Bule, sambia mambaleh WA dari kawannyo di Solok Selatan, mananyoan TdS baa kok indak sampai ka Solok Selatan tahun kini***

 

LEAVE A REPLY

Please enter your comment!
Please enter your name here