Ciloteh Mau Sambut Puaso: Balimau Apo Balunau?

0
803

Mak Malin, bulan puaso kan tingga mahetong jam sajo lainyo. Kama rencana amak kapai balimau.  Ka Bali apo ka Danau Singkarak?,” tanyo Ujang Ota, ka Mak Malin Batuah, sarupo biaso saat sadang duduak-duduak di Taman Tugu Ayam, kebanggaan masyarakat Kabupaten Solok, sahabih shalat Ashar sore kapatang.

“Hahaha, ado-ado se pangana Ujang mah. Masak urang gaek sarupo amak kasatao jo pai balimau lai. Apo lai balimaunyo ka Bali atau ka Danau Singkarak, itu kan indak balimau namonyo do tapi balunau  atau pai raun. Nan dimaksud balimau tu, awak disuruah mansucikan badan dari sagalo kotoran ketek jo nan gadang. Tamasuak mambarasihkan hati dengan saling memaafkan sasamo awak agar barasiah memasuki bulan puaso atau bulan suci,” jawek Mak Malin Batuah sambia agak taheran dek  mandanggaan pertanyaan Ujang Ota, nan mananyoan masalah balimau. “Tapi kecek urang kini kalau ndak sato balimau, katonyo katinggalan zaman indak modren lai, Mak. Rancak awak pai jo balimau ka Danau Singkarak atau  ka Danau Kamba agar indak tatingga bana, Mak!,” sambuang Ujang Ota. “Makonyo kalau awak baagamo, harus punyo ilmu. Urang bailmu tu, harus pulo baagamo. Aratinyo, jikok awak indak amuah salah langkah, pabanyaklah mambaco buku Agamo agar pengetahuan awak batambah. Pai Balimau ka Singkarak jo Danau Kembar, kecek buya haram hukumnyo, karano alah banyak mudarat dari pado manfaatnyo. Sudah tu, mandi-mandi bacampua antaro laki-laki jo padusi, mako manuruik para ulama, itu adolah hasuak kategori haram,” sambung Mak Malin Batuah, sambia mambaco Koran Padang nan alah manajdi bacaan favoritnyo satiok hari. “Haram baapo pulo kecek amak Malin ko. Kan tiok tahun kebiasaan urang awak pai balimau katampek mode tu mah. Jadi baa kok alah kini se haram dan dulu dibiakan sen?,” jawek Ujang Orta, saketek agak taheran mandanga jawek Mak Malin Batuah nan gaya Mak Malin Batuah kayak ustad kondang nan adio di Tivi-Tivi tu . “Baa lo indak ka haram, mandi bacampua laki-laki jo padusi nan tamapk tabukak aureknyo, apo itu mansucikan diri namonyo tu. Kalau mandi bacampua jantan jo batino, itu wow wow namonyo nah,” tarang Mak Malin Batuah.

“Kok iyo haram, apo langkah awak supayo dunsanak awak indak salah langkah dan pai lo balimau ka Singkarak, Mak?” tanyo Ujang Ota ka Mak Malin Batuah. “Kok bisa, di munsajik-munsajik atau di surau-surau nan ado di tiok kampuang, para pengurus masjid tu mahimbau supayo urang indak babondong-bondong juo ka Singkarak atau ka Danau Kembar untuak pai mandi bacampua laki-laki jo padusi nan manganduang maksiat. Mandi balimau tu buliah, tapi alangkah rancaknyo dilakukan di rumah masing-masing dan sucikan niat untuk memasuki bulan nan suci pulo,” jaleh Mak Malin Batuah. “Kok mode tu, awak iyo indak jadi maajak anak jo bini awak pai balimau ka Danau Singkarak do. Rancak awak mandi di batang aia belakang rumah selai sarupo biaso. Nan pentiang kan niek awak mansucikan diri kan, Mak?,” tanyo Ujang Ota, ka Mak Malin Batuah, nan tampak masih manyambuang rokoknyo nan ka ampek batang salamo duduak di Taman Tugu Ayam tu. “Iyo, nan paralu awak pasang niek untuak puaso dan jan lupo saling memaafkan ssamo tetangga, agar hati awak barasiah memasuki bulan nan suci tu,” kecek Mak Malin Batuah.

“Tu batue kecek Mak Malin Batuah tu mah. Jan doso sen nan dibuek, minta maaf indak pernah. Apolai karajo urang tu maotaan urang se. Iyo kan Mak Malin?” tanyo Ujang Ota nan bana-bana suko maota dimano duduak, ka Mak Malin Batuah, nan tampak asyik mancaliak anak gadih jo anak bujang sadang bamesraan di dakek batang kayu kulik manih nan ado di Taman Arosuka. “Alah, untuak apo minta maaf kok di dalam masih bakarak. Nan pentiang bana hati awak nan paralu di jago dan sudah tu minta maaflah kapado bini, tetangga dan ka urang gaek awak,” jaleh Mak Malin Batuah***

LEAVE A REPLY

Please enter your comment!
Please enter your name here