Buayo Vs Cacak Jilik Tigo

0
356

 Oleh: Wandy

“Apo nan waang galakan, Jang! Dari tadi mambaco koran galak-galak surang se nampak dek ambo?!,” tanyo Mak Datuek Sati, kapado Ujang, katiko duduek-duduek di lapau Da Indra, kawasan Kayu Aro, Rabu pagi kapatang.

“Baa indak kagalak dek amak ko! Para petinggi penegak hukum nan ado di pusat tu, alah main gengsi-gengsian inyo. Dikiro dipacayo jadi pejabat, indak kadimintak tangguang jawek kalau lah mati isuek!,” jawek Ujang, sambia manunjukan berita KORAN PADANG, tantang perseteruan KPK dan POLRI nan indak kunjuang usai. “Ondeh, manga lo itu nan ka waang pikian! Karajo waang selah urus, jan sato pulo mamikian negara ko lai. Indak katabuek dek waang do. Kalau pemimpin awak sakik, nan rakyatnyo jan sato pulo sakik lai,” jaleh Datuek Sati.

“Baa pulo Mak Datuek ko! Sabagai warga negara Indonesia yang baik, awak harus sato prihatin mancaliak kondisi bagsa awakko nan sadang kalau balau sarupo iko. Sabananyo iko tugas apak Presiden awak mah. Tapi dek banyak nannyo urus, lupo marandam komlik polisi jo KPK tu. Sahinggo urang tu saliang tangkok dan saliang adu gengsi. Mungkin iko nan dimaksud Buayo Vs Cacak jilik tigo mah!,” tarang Ujang lagi. “Batu kecek Ujang tu mah, Mak Datuek! Seharusnyo masalah ko alah capek kelar mah. Presiden harus turun gunuang atau mamanggia kaduo kubu nan bersiteru. Kan iko komandan gadangnyo presiden. Kalau indak amueh manggalah, copot se apak-apak tu. Jan masyarakat diberi tontonan mambingungkan di tivi-tivi dan berita nan indak mandidik, sarupo nan ado di berita hari kini. Kalau pengamat politik mangecek di tivi, inyo dapek pitih. Nan awak nan manonton ko dapek apo, selain sato lo anggek mandangaan,” sela Rusli Jaya, yang dari tadi serius manyimak pembicaraan hangat antaro Ujang jo Mak Datuek Sati, nan indak kalah seru jo acara Bang One nan ado di salah satu stasin tivi swasta.

“Baa pulo presiden ka turun gunuang, tapi apak tu wak danga ka baralek. Tantu baliau tu agak sibuk mambuek undangan jo mamanggia!,” garah Mak Datuek Sati, sambia mamasan teh sarok kasukannyo, ka Uda In si pemilik lapau politik. Maklum di lapau tu acok para pejabat dan anggota dewan duduek sambia mebahas issu terhangat nan tajadi dalam sapakan terakhir. “Hahahaha, batue ju mah, Mak Datuek! Apo Mamak indak di undang baralek. Kan amak pendukuang barek presiden awak tu kapatangko waktu urang pilpres?,” tanyo Ujang lagi sambia manyambuang rokok kesukaannyo nan tingga puntuangnyo sajo. “Lailah, kan kalau kapalo negara nan baralek, awak nan paralu bana datang. Kan bisa manonton di tivi sai,” jawek Datuek Sati, sambia manggeser dudueknyo.

“Kini ko zaman musim basiteru mah, Jang! Lihat sajo masalah Partai PPP dan Golkar, alun ado nan jaleh ciek juo mano nan sah! Selain tu, pemimpin awak di pusat tu yo sabana santiang. Untuak mahilangkan kasus satu nan indak salasai, mako dimunculkan kasus nan baru. Sahinggo perhatian publik fokuslo ka nan baru. Samantaro nan lamo tantu hilangse inyo,” tarang Rusli Jaya, yang terkenal sebagai pengamat politik andal tingkek Kabupaten Solok. “Kalau itu bana kecek uda Rusli tu mah! Salamoko di negara awak emang mode tu! Banyak kasus nan indak salasai. Sabagai contoh, Mantan Sekjen Partai Demokrat dulu pernah bakato di tivi, baraso itu nan inyo bukak baru lembaran pertama. Masih banyal lembaran dan halaman lain nan alun dibukak, tapi sampai kini halaman kaduo se alun juo dibukaknyo lai,” jaleh Mak Datuek Sati sambia baliak galak gadang, sahinggo urang nan lalu di jalan sato lo mancaliak urang-urang tu carito politik.

“Sudahlah, jan itu juo topik pembicaraan lai. Wak ganti jo siapo calon Bupati awak nan kadipiliah untuak mamimpin limo tahun ka mungko. Sabek kini alah adem ayem senyo. Dulu muncul bak jamur di musim gerimis. Kini ka ma apak-apak tunyo?,” tanyo Ujang. “Kalau untuek calon Bupati, edisi bisuek se wak bahas lai!,” jaleh Mak Datuek Sati, sambia mamanggia pemilik lapau, sabek alah ado talepon dari biniyo, minta diantaan ka Puskesmas, sabek kapalo bininyo acok pusiang-pusiang!***

BAGIKAN
Berita sebelumyaJawi Naiak Kijang
Berita berikutnyaWartawan UKW…….

LEAVE A REPLY

Please enter your comment!
Please enter your name here