Bini Pak Dewan Mulai Curiga

0
1598
oleh: Wandy

 

Bini Anggota Dewan Mulai Cameh Di kantue DPRD Kabupaten Solok, hari Rabu siang kapatang, di adoan partemuan para isteri anggota dewan. Biasolah, kalau induak-induak tu alah bakumpua, labieh heboh lo pado acara nonton konser group musik Guns N’ Roses (GNR) nan terkenal dari benua Amrik.

“Buk Yen, awak ko kamari bedo kini mah. Dulu awak nan mati-matian mancari suaro agar para laki awak tu duduak menjadi anggota dewan. Tapi kini awak alah agak mulai cameh, sabek sajak laki awak alah dilantik jadi dewan, kini alah agak jarang lalok di rumah. Acok kalua daerah dan lalok di hotel,” curhat ibuk Mirna, salah surang bini anggota dewan dari Partai Tambahan, kapado kawannyo Yen Bustami, nan sasamo bini anggotadewan, usai makan siang sahabih partamuan Rabu kaptang di gaduang dewan Arosuka nan bagonjong. “Oo, kalau mode tu lai samo pikiran awak nah buk Mirna! Kini anak awak nan paliang ketek acok jago tangah malam, mananyoan apaknyo kalau sadang kalua daerah. Maklum sibungsu tu yo sabana dakek jo papanyo,” jawek Buk Yen Bustami, nan biasonyo mamangia apak untuak anaknyo, namun saja manjadi anggota dewan alah dirubah dengan sabutan papa.               “Kadang-kadang di tangah malam nan haniang tu, awak bapikia nan indak-indak, sadang manga kolah laki awak di subarang sinan. Lai kolah ndak punyo wanita idaman lain lo,” sambuang Buk Mirna lagi.

“Kalau masalah itu ndak usah lah awak bapikia nan indak-indak! Do’a sajo supayo laki awak surang-surang tu lai di jalan nan bana dan batua-batua pai karajo untuek kapentingan masyarakek. Uni alah ampia tigo tahun manjalani hidup mode iko. Uni pasankan kalaki sabalun barangkek, ingek anak bini manunggu di rumah,” jawek Buk Minah, salah seorang isteri anggota dewan yang suaminyo sudah tigo priode tapiliah manjadi  wakil rakyat dari dapil limo.

“Kalau ibuk Minah mungkin alah tabiaso ditingga-tinggaan dek laki. Kalau awak kan akun kamo ko jadi bini pejabat DPRD ko,” cetus Buk Mirna lagi. “Kalau itu, yo bana kecek ibuk Minah tu mah Buk Mirna! Awak do’akan se laki awak kalau kalaua daerah, jan sampai macan-macan. Sudah tu, jan luponyo di servis sabalun barangkek sapuehnyo agar ndak nakal di luar sana,” sela Buk Yen Bustami lagi, sambia diikuti galak gadang dek ibuk-ibuk anggota dewan nan lain. “Iyo juo nah buk Yen! Tapi kadang-kadang awak bapikia nan idak-idak, jangan-jangan laki awak tu kalau malam-malam waktu lalok di hotel, alah manguruang anak gadih urang lo. Tapi mudah-mudahan tu lai perasaan awak senyo,” sambuang Buk Mirna sambia nadanyo agak mulai randah. “Tapi kalau dipikia-pikia, pandapek Buk Mirna tu paralu juo awak minok manungkan. Sabek laki-laki tu kalau di rumah bacoh kuciang dibaoan lidih. Tapi kalau alah kalua, mano tau awak nan nyo karajoan! Sela Buk Yen Bustami.

“Makonyo awak bapikia nan positif se. Kan laki awak tu pai kalua, selain untuek tugas negara, kan juo untuek kapentingan asok dapue awak di rumah masing-masiang,” jelas Buk Minah lagi. “Yo lah, Buk Minah! Kalau masalah kasabaran tu, awak tantu harus banyak baraja ka ibuk. Sabek suami ibuk alah tigo priode duduek di DPRD. Kalau suami awak kan baru limo bulan ko!,” kecek buk Yen Bustami lagi. “Nan pentiang awak laki bini tu harus saliang picayo. Jadi kalau laki mancari, awak iringi se jo do’a!,” tutur Buk Minah. “Iyo buk, tarimokasih sarannyo. Awak kabalakang dulu sabanta, waktu salat Zuhur alah nak ampia habis lai. Wak alun salat lai!,” ucap Buk Yen Bustami sambia minta izin untuak mengambil air wuduk. “Assalamu’alaikum!,” kecek buk Buk Ye Bustami sambia balalu kabalakang! “Wa’alaikum salam!,” jawek buk Minah jo ibuk-ibuk bini anggota dewan nan lain hampia sarentak!***

LEAVE A REPLY

Please enter your comment!
Please enter your name here