Bancano Siliah Baganti

0
486

WANDY

 

“Mak, dalam sapakanko, musibah yo siliah baganti malando Kabupaten Solok nan awak cintoi ko dan juo hampia saluruh daerah di Ranah Ranah Minang ko. Salain hujan badai, longsor jo banjir sarato gampo datang siliah baganti. Iyo sabananyo nyo uji awak dek nan punyo karajaan langik jo bumi, Mak!,” kecek Andy Bule ka Mak Malin Sampono, sarupo biaso, mambukak ota di lapau politik milik Da Indra, nan indak jauah lataknyo dari Tugu Ayam Arosuka, Rabu sore kapatang.

“Itulah nakan! Musibah nan datang hampia  indak baranti malando nagari awakko, adolah akibek ulah manusia juo. Manuruik pengamatan amak, musibahko datang marupokan teguran langsuang dari Tuhan ka umatnyo nan lai bapikia, apoko salamo ko karajo awak alah batua atau alun,” jawek Mak Malin Sampono, sambia mahiruk rokok kretek kasukaanyo dalam-dalam. “Batua mah, Mak Malin! Sasuai berita nan awak baco di KORAN PADANG, setelah bancano longsor dan musibah banjir nan malando daerah Solok nan mangakibabkan kerugian hingga Milyaran Rupiah, Tigo hari kemudian yakni hari Salasa patanko, alah tajadilo musibah gampo gadang nan mahorayak daerah Pasisie Salatan nan goyangnyo sampai dirasoan di Kabupaen Solok. Handaknyo saluruh banncano nan tajadi tu, manjadi introseksi diri dek awak masiang-masiang. Apoko iko iyo alah Tuhan bana nan berang ka awak, atau tanyolah ka rumpuik nan bagoyang. Atau alam mulai indak lai bsahabat jo awak?,” jaleh Andy Bule, nan sarpo biaso tangannyo indak lapeh dari manakan tuts HP mambaleh WA dari kawannyo nan ado di Payokumbuah, apokoh pajabaik eselon Ampek alah balantik di Kabupaten Solok atau alun. “Nan nakan sampaian tu bana mah! Sado musibah nan datang ka awak, itu tantu akibab ulah awak juo. Apoko salamoko para pamimpin awak alah amanah jo jabatannyo. Sudah tu lai ndak banyak urang nan maupek dek ulah kabijakannyo. Kok masih samojo pamimpin nan baru jo nan lao parangainyo, itu alah marugi awak namonyo mah,” sambuang Mak Malin Sampono, tampak sangek manikmati rokok kreteknyo dengan mahiruk dalam-dalam. “Tapi salain pemimpin, tingkah laku awak sabagai masyarakaik, harus patueh lo kaparintah agamo, Mak! Kok petani awak, lai ndak sambarang marambah hutan se, beko nan kaseso anak cucu awak juonyo. Contohnyo banjir nan tajadi di Salayo dan Koto Baru patang, itu akibek rimbo awak alah banyak nan botak. Kok jadi tukang manggaleh awak, apo lai timbangan tu lai samo barek. Kok sakilo iyo sapuluah mato kok manjua. Intinyo jujur dan indak nan kalamak dek awak sen do,” tutur Andy Bule, sambia matonyo tatuju ka jalan raya mancaliak hujanmasih sajo manyirami Ibukato Kabupaten Solok, Arosuka.

“Tumben bicaranyo kayak pengamat nan ado di tivi-tivi tu, Mak! Biasonyo indak lapeh dari ota politik, kok kini bicara masalah jeritan hati masyarakat ketek?,” sela Astra nan dari tadi sibuk main catue jo Da Indra. “Aalah, ang urus selah kudo ang tu, Astra. Beko nyo semba dek rencong Da In beko,” jawek Andy Bule, sambia mancaliak kudo Astra tarancam dek ster Da Indra***

TINGGALKAN KOMENTAR

Masukkan Komentar
Masukkan Nama Anda