Manunggu Mutasi

0
568

Oleh: Wandy- Wartawan Koran Padang

“Andy, awak danga dalam wakatu dakek ko akan ado mutasi gadang-gadangan bagi PNS di kantua Bupati awakko. Apo itu batua beritanyo?,” tanyo Mak Malin Sampono ka Andy Bule, katiko duduak-duduak di lapau politik punyo Da Indra, Kawasan Kayu Aro, Rabu kapatang.

“Kok dibaco di koran, kabanyo alah sajak bulan Agustus patang ko akan ado mutasi lai, Mak Malin. Tapi sampai kini alun juo baputa mutasi tu lai. Kok bisa, Bupati jo wakil Bupati sacapeknyo maambiak sikap untuak malakukan mutasi tu. Bia urang nan karajo indak maleh-maleh dan loyo. Sabek pejabat tu mungkin bapikia, untuak apo karajo rajin-rajin, alun tantu juo nyo kadipakai dek Bupati lai,” jawek Andy Bule panjang leba ka Mak Malin Sampono. “Batua bana itu mah, Ndy! Amak satuju kalau Kapalo Daerah sacapeknyo manggulirkan mutasi tu. Sabek itu kan alah hak kapalo daerah untuak manantukan sia urang nan kadipakai dalam kabinet pemerintahan nan bisa mambantu tugeh baliau. Nan jaleh bana kalau bagian teknis tantu urang nan mangarati teknis. Kalau untuak kapalo Dinas Pendidikan, tantu iyo jaleh urang nan faham bana jo pendidikan dan memiliki ilmu kepemimpinan, baitu juo untuak bagian nan lain. Urang indak bisa mainterpensi atau ikut campua masalah mutasi go do. Nan bisa hanyo maagiah saran, tapi kaputusan akhir tetap samo baliau tu!,” jawek Mak Malin Sampono, sambia maelo Koran Padang nan ado di meja nan alun sempat beliau baco.

“Iyo nah Mak Malin! Alah duo tahun labiah Bupati jo Wakia Bupati dilantik dan alah sawajarnyo pulo baliau manunjuak urang kepercayaan untuak diagiah mandat nan sajalan jo baliau. Tapi sampai kini alun juo mutasi tu bajalan lai,” tarang Andy Bule ka Mak Malin Sampono. “Apo mungkin dek masih manunggu hasil nego-nego jo pihak lain atau ado pertimbangan lain. Kalau wak danga, hampie saparoh rapor SKPD ko merah. Nan kapalo dinas labiah banyak takuit dek pemimpin dari pado dek Tuhan, sehingga kerja Asal Bapak Senang alias ABS sen,” ujar Mak Malin Sampono  sambia baliak batanyo ka Andy Bule. “Mungkin juo kali mah, Mak! Kabanyo ado babarapo kapalo OPD ko nan karajonyo maikue Kabupati sen. Sehinggo karajonyo surang indak salasai dek inyo do,” kecek Andy Bule, nan tangannyo subuk mamencet tuts HP mambaleh WA kawannyo nan mananyoan harago lado putu di Pasa Guguak.

“Masalah mutasi, rotasi atau promosi kecek rang kini, itu alah karajo Bupati jo Wakie Bupati mah, Mak Malin. Jadi manga lo awak nan kasibuk mamikian. Rancak main catua wak, mano tau bulan April bisuakko takirim manjadi atlet ikut kejurda di kota Padang,” sela Astra, yang dari tadi sibuk se manonton TV masalah Setnov mulai banyanyi tentang proyek e-KTP dan manyabuik namo-namo gadang dan politisi lainnyo. Astra tapaso manonton Tivi, sanek lawan tandiangnyo indak Da Indra sadang sibuk malayani pambali. “Itu batua juo mah Astra. Tapi kalau awak indak paduli jo roda pemerintahan ko, sia nan kadipicayo lai. Kok anggota dewan awak karajonyo pi sibuk kalua daerah sen. Padohal rakyat alah mamiliah dewan untuak maawasi karajo pemerintah bukan bamitra jo pamerintah,” jawek Mak Malin Sampono ka Astra. “Alah, Astra indak paralu bana diladani tu Mak Malin. Inyo indak faham jo carito awakko do. Rancak pulang awak lai, sabek hari alah manjalang waktu Ashar,” tarang Andy Bule, sambia mengucapkan salam ka urang di lapau dan di kawek sarentak ‘Wa’alaikum salam dek pengunjuang lapau politik Da Indra***

 

LEAVE A REPLY

Please enter your comment!
Please enter your name here